Apple ធ្លាប់បានធ្វើបេសកកម្មដើម្បីធ្វើឱ្យឧបករណ៍ទាំងអស់របស់ខ្លួនស្តើង និងស្រាលជាងមុន។ មហិច្ឆតានេះបណ្តាលឱ្យ iPhones កោង និង MacBook Pros ដែលបានដករន្ធឌុយសំខាន់ៗ និងមានក្តារចុចដ៏សែនពិបាកប្រើ។
ក្នុងរយៈពេលប៉ុន្មានឆ្នាំចុងក្រោយនេះ Apple បានផ្លាស់ប្តូរឧបករណ៍ ផ្តោយទៅលើ អាយុកាលថ្ម រន្ធឌុយ និងមុខងារសំខាន់ៗផ្សេងទៀត ជាជាងភាពស្តើងនៃឧបករណ៍។ ប៉ុន្តែទំនោរនេះត្រូវប្រែប្រួលទៀតហើយ។ យោងតាមរបាយការណ៍ថ្មីមួយ Apple បានត្រឡប់មកផ្តោតលើភាពស្តើង ហើយវានឹងមកដល់សម្រាប់ iPhone, MacBook Pro និង Apple Watch ក្នុងពេលឆាប់ៗនេះ។ iPad Pro M4 ថ្មីៗនេះបង្ហាញថា Apple ប្រហែលជាជោគជ័យនៅពេលនេះ។ iPad Pro M4 ថ្មីមិនគ្រាន់តែស្តើងជាងនេះទេ វាជាឧបករណ៍ស្តើងបំផុតដែល Apple មិនធ្លាប់បានផលិត វាស្តើងជាងសម្បីតែ iPod shuffle និង nano។
យើងមិនអាចបដិសេធបានទេ ថាចំណាប់អារម្មណ៍ដំបូងរបស់ iPad Pro M4 គឺមានភាពស្តើង និងស្រាលខ្លាំង បើប្រៀបធៀបទៅនឹង iPad ជំនាន់មុន ប៉ុន្តែភាពស្តើងនេះក៏បង្កអោយមានការព្រួយបារម្ភផងដែរទៅលើបទពិសោធន៍មិនល្អ នៃកំហុសរបស់ឧបករណ៍ស្តើងៗពីអតីតកាល។
ក្តីបារម្ភចម្បង ទៅលើកម្រិតថ្ម និងការពត់កោងរបស់វា ប៉ុន្តែជាមួយនឹងការធ្វើតេស្តថ្ម និងពត់យ៉ាងតឹងរ៉ឹង iPad Pro M4 បានបង្ហាញថា មិនមានការព្រួយបារម្ភទាំងនោះឡើយ។
M4 iPad Pro បានកំណត់ស្តង់ដារថ្មីមួយសម្រាប់ឧបករណ៍ស្តើង។ វាមិនបានលះបង់ថាមពលថ្មឡើយ ហើយវាក៏មិនផុយស្រួយដែរ។ មិនត្រឹមតែប៉ុណ្ណោះ វាថែមទាំងបញ្ចូលទៅក្នុងបច្ចេកវិទ្យាទំនើបបំផុតដែលមិនធ្លាប់មាននៅក្នុង iPad។ iPad Pro M4 បង្ហាញថា Apple បានរៀនពីកំហុសរបស់ខ្លួនកាលពីអតីតកាល ហើយអាចផលិតឧបករណ៍ស្តើង និងស្រាលជាងមុន។
iPhone MacBook Pro និង Apple Watch ជំនាន់ក្រោយ សុទ្ធតែទទួលបានអត្ថប្រយោជន៍ពីភាពជោគជ័យរបស់ iPad Pro។ ប្រសិនបើ Apple អាចរក្សាបាននូវស្តង់ដារបច្ចុប្បន្នរបស់ខ្លួនសម្រាប់អាយុកាលថ្ម ខណៈពេលដែលធ្វើឱ្យ iPhone, MacBook Pro និង Watch កាន់តែស្តើង និងស្រាលជាងមុន ឧបករណ៍ថ្មីទាំងនោះនឹងតំណាងឱ្យការរីកចម្រើន hardware ដ៏សំខាន់បំផុតមួយចំនួននៅក្នុងប៉ុន្មានឆ្នាំថ្មីៗនេះ។ មិនមែនគ្រប់គ្នាសុទ្ធតែចង់បានឧបករណ៍ស្តើងជាងមុននោះទេ ហើយអ្នកខ្លះប្រហែលជាចូលចិត្តម៉ូដែលក្រាសជាងប៉ុន្តែទទួលបានថ្មធំជាងមុន ប៉ុន្តែជម្រើសរបស់ Apple ជាមួយ iPad Pro M4 ត្រូវបានបំពេញដោយភាពវិជ្ជមានលើសលប់។
